Mwen sèten Combronne, Madan Max Adolphe, Bennett ak tout moun ki te konn abitye al benyen nan pisin lakay yo...ki te konn patisipe na defile mòd manto, nan chanm klimantize - sonje jan sa te "bon" nan tan lontan.
A wi, bon tan lontan, lè Prezidan Bonbonfle te konn fè kous machin ofisyèl nan kapital la pandan limenm ak fanm li ap voye sak degouden ak 20 kòb nan fal malere - san konte sa ki mouri krabinen anba kawosri machin "chèf".
A wi, bon tan lontan, lè nèg te konn ale pran masaj gratis nan Fò Dimanch.
Mwen sonje mouch !
Wi, sa te bon vre. Richard Brisson, ou tande yo?
Jacques Stephen Alexis, ou tande yo?
E oumenm ti Filojèn ou tande yo?
Sa te bon alepòk. Yo nostaljik, yo vle fè bak aryè...gadavou !
Imamou Lele o - Avèk yo ou san yo...Ayiti ap chanje!
Ou tande tèt chaje?
Jafrikayiti